विराटनगर किंग्स ७७ रनले पराजित, सुदूरपश्चिम रोयल्सको फाइनल यात्रा सुनिश्चित
कमल कुमार शाही
स्वाभिमान खबर, मंसिर २३
काठमाडौं। दोस्रो संस्करणको सिद्धार्थ बैंक नेपाल प्रिमियर लिग (एनपीएल) को पहिलो क्वालिफाएरमा सुदूरपश्चिम रोयल्सले उत्कृष्ट प्रदर्शन गर्दै विराटनगर किंग्सलाई ७७ रनले पराजित गरेको छ। प्रभावशाली जितसँगै रोयल्सले प्रतियोगिताको फाइनलमा स्थान पक्का गरेको छ।
मंगलबार त्रिवि क्रिकेट मैदानमा टस हारेर पहिले ब्याटिङ गरेको सुदूरपश्चिमले निर्धारित २० ओभरमा सात विकेट गुमाउँदै १५६ रनको चुनौती पेश गर्यो। जवाफी ब्याटिङमा उत्रिएको विराटनगर १४.१ ओभरमै ७८ रनमा समेटिँदा सुदूरपश्चिमको फाइनल यात्रा सहज बन्यो।
विराटनगरको पावरप्लेमा संकट
विराटनगर किंग्सले इन्निङको सुरुबाटै दबाब महसुस गर्यो। पहिलो ओभरमै तीन विकेट गुमाउँदा टिम तनाबमा परेको थियो।
पहिलो बलमै साम हिजलेट आउट
छैटौँ बलमा मार्टिन गप्टिल रन आउट
त्यही ओभरमा नरेन भट्ट शून्यमा पेभेलियन फर्किए
शीर्ष क्रम ध्वस्त भएपछि विराटनगर फर्कन सकेन। फाफ डु प्लेसिसले ३६ रन बनाएर टोलीलाई सम्हाल्न प्रयास गरे पनि सहयोगी साझेदारी नबन्दा विराटनगर साना–साना योगफलमा रोकियो। मर्चेन्ट डी लाङले १५ र बसिर अहमदले १२ रन जोडे।
रोयल्सको बलिङको वर्चस्व
सुदूरपश्चिमका बलरहरूले विराटनगरलाई कुनै पनि समयमा खेलमा फर्कने मौका दिएनन्।
स्कट कुगेलेइन – २ विकेट
हर्मित सिंह – २ विकेट
अविनाश बोहोरा – २ विकेट
हेमन्त धामी र दिपेन्द्र सिंह ऐरी – १–१ विकेट
समन्वित र आक्रामक बलिङले विराटनगरको ब्याटिङ लाइनअप पूर्ण रूपमा विफल बनायो।
सुदूरपश्चिमको इनिङ : विनोद भण्डारीको अर्धशतक
ओपनर विनोद भण्डारी सुदूरपश्चिमको इन्निङका नायक बने। ५२ बलमा ६३ रन बनाएर उनले टोलीलाई सशक्त सुरुवात दिलाए। उनको पारीमा तीन चौका र दुई छक्का समावेश थिए।
सहयोगी रूपमा—
आरिफ शेख – २० रन
शेल्डन ज्याक्सन – २० रन
हर्मित सिंह – १४ रन
इशान पाण्डे – १३ रन
मुख्तर अहमद – १० रन
विराटनगरका प्रतिश जिशी र मर्चेन्ट डी लाङले समान २–२ विकेट लिए भने सूर्य तामाङ र साम हिजलेटले एक–एक विकेट हात पारे।
अब रोयल्सको लक्ष्य – उपाधि
पहिलो क्वालिफायरमै फाइनल सुनिश्चित गर्दै सुदूरपश्चिम रोयल्स अब उपाधि जित्ने बलियो दाबेदारका रूपमा देखिएको छ। सुदूरपश्चिमले यो संस्करणमा निरन्तर उत्कृष्ट प्रदर्शन गर्दै आएको छ र फाइनलमा पनि उही लय कायम राख्न चाहनेछ।
अब उपाधिका लागि रोयल्स दोस्रो क्वालिफायरको विजेतासँग भिडन्त गर्नेछ। प्रतियोगिताको रोमाञ्चक फाइनलले नयाँ इतिहास र नयाँ विजेता जन्माउने अपेक्षा गरिएको छ।
प्रतिक्रिया दिनुहोस्