क्यान्सर अस्पताल सुधारका ६ माग : उपचारमा ढिलाइ अन्त्यदेखि बिरामीमैत्री सेवा विस्तारसम्म
कमल कुमार शाही
स्वाभिमान खबर, असोज ९
भरतपुर ।
बीपी कोइराला मेमोरियल क्यान्सर अस्पताल (BPKMCH) को सेवा प्रवाह, बिरामीको उपचारमा हुने ढिलाइ तथा अस्पतालको व्यवस्थापन सुधारका विषयमा अस्पताल नेतृत्वसँग प्रारम्भिक छलफल भएको छ।
अस्पतालका अध्यक्ष प्रा. डा. योगेन्द्र प्रसाद सिंह, अस्पतालका निर्देशक डा. उमेश नेपाल, प्रशासनिक प्रमुख गिरिनारायण महतो र चितवन का युवा सामाजिक अभियन्ता डा . प्रकाश चन्द्र , अटल पाण्डे, भरत न्यौपाने , बुद्ध पाख्रीन भिम पाख्रीन अनुश्रुत थापा लगायतसँग भएको छलफलमा बिरामीको उपचारलाई सहज, छिटो र पारदर्शी बनाउनुपर्ने विषयमा मुख्य रूपमा ६ वटा माग तथा सुझाव प्रस्तुत गरिएको बताइएको छ।
छलफलमा अपरेसनको मिति बढीमा दुई साताभित्र, बायोप्सीको रिपोर्ट बढीमा १० दिनभित्र तथा CT Scan र अन्य प्रयोगशाला परीक्षणको रिपोर्ट बढीमा दुई दिनभित्र उपलब्ध गराउने व्यवस्था गर्नुपर्ने माग गरिएको छ। उपचारका क्रममा हुने अनावश्यक प्रतीक्षाले क्यान्सरका बिरामी र परिवारमा थप मानसिक तथा आर्थिक भार पर्ने भएकाले समयमै सेवा उपलब्ध गराउनुपर्नेमा जोड दिइएको छ।
त्यस्तै, अस्पतालको आवास सुविधामा ड्युटीको चाप बढी भएका चिकित्सक तथा साना बच्चा भएका नर्सलगायत स्वास्थ्यकर्मीलाई प्राथमिकता दिनुपर्ने माग उठाइएको छ। अस्पताल परिसरमा आवास सुविधा लामो समयदेखि प्रयोग गरिरहेका व्यक्तिहरूको व्यवस्थापन गरी वास्तविक आवश्यकता भएका स्वास्थ्यकर्मीलाई सुविधा उपलब्ध गराउनुपर्ने धारणा छलफलमा राखिएको बताइएको छ।
बिरामीका आफन्तलाई बस्न सहज होस् भन्ने उद्देश्यले अस्पतालमै आधारभूत सुविधा सहितको कुरुवा होस्टेल सञ्चालन गर्नुपर्ने माग पनि अघि सारिएको छ। उपचारका लागि टाढाटाढाबाट आउने बिरामीका आफन्तलाई बसोबासको समस्या हुने भएकाले यस्तो व्यवस्था आवश्यक रहेको सहभागीहरूको भनाइ छ।
छलफलमा बीमा सुविधाअन्तर्गत उपलब्ध हुने केमोथेरापीका औषधिको गुणस्तर सम्बन्धमा बिरामीबाट उठाइएका प्रश्नलाई गम्भीरतापूर्वक सम्बोधन गर्नुपर्ने मागसमेत गरिएको छ। औषधिको गुणस्तर, आपूर्ति र प्रयोगसम्बन्धी प्रक्रिया पारदर्शी बनाउँदै बिरामीको उपचारमा गुणस्तरको सुनिश्चितता गर्न अस्पताल प्रशासनसँग आग्रह गरिएको छ।
त्यस्तै, बिरामीलाई आवश्यक पर्ने औषधि तथा सर्जिकल सामग्री अस्पतालकै प्रणालीमार्फत उपलब्ध गराउने व्यवस्था गर्नुपर्ने माग राखिएको छ। यसले बाहिरी बिचौलिया वा अनधिकृत व्यक्तिमार्फत बिरामी ठगिने सम्भावना घटाउने र उपचार प्रक्रियालाई थप पारदर्शी बनाउन सहयोग गर्ने अपेक्षा गरिएको छ।
अस्पतालको बोर्डमा सरकारबाट नियुक्त गरिएका केही सदस्यको भूमिकाका विषयमा पनि छलफलमा प्रश्न उठाइएको छ। अस्पतालको जिम्मेवारीमा आउने पदाधिकारीले व्यक्तिगत वा राजनीतिक पहुँचभन्दा बिरामीको हित, संस्थागत जवाफदेहिता र स्वास्थ्य सेवाको गुणस्तरलाई प्राथमिकता दिनुपर्ने धारणा राखिएको छ।
छलफलमा सहभागी पक्षले अस्पताल सुधारका विषयमा आगामी दिनमा पनि निरन्तर खबरदारी गर्ने बताएका छन्। अस्पताल प्रशासन र बोर्डका आगामी पदाधिकारीले बिरामीको उपचारमा हुने ढिलाइ, औषधि तथा सामग्रीको उपलब्धता, आवास व्यवस्थापन र सेवा प्रवाहका समस्यालाई प्राथमिकताका साथ सम्बोधन गर्नुपर्नेमा जोड दिइएको छ।
सहभागीहरूले आफूहरूको अभियान क्यान्सर पीडित बिरामी र आम नागरिकको उपचार अधिकार तथा अस्पताल सुधारमा केन्द्रित रहने बताएका छन्। अस्पतालभित्र हुने अनियमितता वा बिचौलियाको प्रभावबारे प्रमाणसहित आवाज उठाउने र आवश्यक परे सम्बन्धित निकायको ध्यानाकर्षण गराउने उनीहरूको भनाइ छ।
यद्यपि, छलफलमा उठाइएका आरोप तथा दाबीहरूको स्वतन्त्र पुष्टि भने हुन बाँकी छ। अस्पताल प्रशासनको औपचारिक धारणा तथा यी माग कार्यान्वयनका लागि तय हुने योजना सार्वजनिक भएपछि विषय अझ स्पष्ट हुने देखिन्छ।
प्रतिक्रिया दिनुहोस्