कर्णाली खेलकुद परिषद् सदस्य सचिव नियुक्त अन्तिम चरणमा, तीन जना उम्मेदवार छनोट
कमल कुमार शाही
स्वाभिमान खबर,माघ ३
सुर्खेत । कर्णाली प्रदेश खेलकुद विकास परिषद्को रिक्त सदस्य सचिव पदको नियुक्ति प्रक्रिया अन्तिम चरणमा पुगेको छ । सामाजिक विकास मन्त्रालय, कर्णाली प्रदेशले निर्धारण गरेको छनोट प्रक्रियाअनुसार मूल्यांकन र अन्तर्वार्ता सम्पन्न गरी तीन जना उम्मेदवारलाई अन्तिम सिफारिस सूचीमा समावेश गरेको हो ।
सामाजिक विकास मन्त्रालयले २०८२ असोज ३० गते प्रकाशित सूचनामार्फत सदस्य सचिव पदका लागि आवेदन आह्वान गरेको थियो । प्रारम्भिक योग्यता परीक्षणबाट छनोट भएका १० जना उम्मेदवारमध्ये २०८२ कात्तिक ३ गते अन्तर्वार्ता लिइएको मन्त्रालयले जनाएको छ । ‘कर्णाली प्रदेश खेलकुद विकास परिषद् सदस्य सचिव छनोट सम्बन्धी मापदण्ड, २०८२’ अनुसार उम्मेदवारहरूको दफा ७ बमोजिमको मूल्यांकन अङ्क र दफा ८ बमोजिम अन्तर्वार्तामा प्राप्त अङ्कका आधारमा योग्यता क्रम निर्धारण गरिएको हो ।
दफा ९ अनुसार सार्वजनिक गरिएको सिफारिस सूचीमा पहिलो स्थानमा वीरेन्द्रनगर नगरपालिका–७, सुर्खेतका रविन्द्र चन्द परेका छन् । दोस्रो स्थानमा भेरीगंगा नगरपालिका–४, सुर्खेतका दिपक हमाल रहेका छन् भने तेस्रो स्थानमा वीरेन्द्रनगर नगरपालिका–५, सुर्खेतका प्रमोद हमाल रहेका छन् ।
मन्त्रालयले सम्बन्धित सबैको जानकारीका लागि सिफारिस योग्यता क्रम सार्वजनिक गरिएको जनाएको छ । अब प्रदेश सरकारको निर्णयपछि कर्णाली प्रदेश खेलकुद विकास परिषद्को सदस्य सचिव नियुक्ति हुने प्रक्रिया टुंगिनेछ ।
खेलकुद पूर्वाधार विकास, प्रदेशस्तरीय खेल नीति कार्यान्वयन, खेलाडी प्रोत्साहन तथा विभिन्न प्रतियोगिताको व्यवस्थापनमा सदस्य सचिवको भूमिका महत्वपूर्ण हुने भएकाले यस नियुक्तिलाई कर्णाली प्रदेशको खेलकुद क्षेत्रसँग जोडेर चासोका साथ हेरिएको छ ।
प्रतिक्रिया दिनुहोस्