राष्ट्रिय लोक दोहोरी गीत प्रतिष्ठान अछाम शाखाको नवौं अधिवेशनको उद्घाटन सत्र सम्पन्न, हास्य कलाकार खष्टे खलासको प्रस्तुति आकर्षणको केन्द्र
मान बहादुर चलाउने (संगम)
स्वाभिमान खबर, कार्तिक २२, अछाम विनायक।
राष्ट्रिय लोक दोहोरी गीत प्रतिष्ठान नेपाल अछाम शाखाको नवौं अधिवेशनको उद्घाटन सत्र तथा साँस्कृतिक कार्यक्रम भव्य रूपमा सम्पन्न भएको छ। प्रतिष्ठानका अध्यक्ष देवेन्द्र प्रसाद भाटको अध्यक्षतामा सम्पन्न उक्त कार्यक्रममा प्रमुख अतिथि पञ्चदेवल विनायक नगरपालिकाका नगर उपप्रमुख हर्क बहादुर रावल रहनुभएको थियो।
कार्यक्रमका विशिष्ट अतिथि राष्ट्रिय लोक दोहोरी गीत प्रतिष्ठान सुदूरपश्चिम प्रदेश कोषाध्यक्ष हेमन्ता भट्टराई रहनुभएको थियो भने अन्य अतिथिहरूमा स्थानीय तहका जनप्रतिनिधि, समाजसेवी, कलाकार तथा संगीतप्रेमीहरूको उल्लेख्य उपस्थिति रहेको थियो।
साँस्कृतिक सत्रमा अहिलेका चर्चित हास्य कलाकार **हेमराज अधिकारी ‘खष्टे खलास’**ले प्रस्तुत गरेका हास्यव्यङ्ग्यले दर्शकहरूलाई खुबै मनोरञ्जन प्रदान गरेका थिए। साथै, स्थानीय लोक तथा दोहोरी कलाकारहरूले आ–आफ्ना उत्कृष्ट प्रस्तुति दिँदै कार्यक्रममा सांगीतिक र सांस्कृतिक रौनक थपेका थिए।
कार्यक्रमको स्वागत मन्तव्य प्रतिष्ठानका उपाध्यक्ष ललित रजगाईंले राख्नुभएको थियो भने नेपाल कम्युनिष्ट पार्टी (नेकपा) अछामका जिल्ला सचिवालय सदस्य मान बहादुर चलाउनेले पनि स्वागत मन्तव्य राख्नुभएको थियो। कार्यक्रम सञ्चालन दल बहादुर साउद र रुपक परियारले सह–संचालन गर्नुभएको थियो।
उद्घाटन सत्र सफलतापूर्वक सम्पन्न भएपछि अहिले प्रतिष्ठानको बन्द सत्र जारी रहेको छ, जसमा आगामी कार्यकालका लागि नयाँ नेतृत्व चयन प्रक्रिया सुरु भएको बताइएको छ।
कार्यक्रमले अछाममा लोकदोहोरी क्षेत्रको सशक्त उपस्थिति, सांस्कृतिक चेतनाको निरन्तरता र मौलिक संगीतप्रतिको प्रेमलाई झल्काएको सहभागीहरूको भनाइ छ।
प्रतिक्रिया दिनुहोस्