सुर्खेतमा राष्ट्रिय लोक तथा दोहोरी गीत प्रतिष्ठानको ९औं साधारण सभा सम्पन्न, कविराज गिरी सर्वसम्मत अध्यक्ष निर्वाचित
कमल कुमार शाही
स्वाभिमान खबर , कात्तिक २२
सुर्खेत । राष्ट्रिय लोक तथा दोहोरी गीत प्रतिष्ठान नेपाल सुर्खेत शाखाको ९औं साधारण सभा सम्पन्न भएको छ । सभाबाट कविराज गिरी सर्वसम्मत रूपमा शाखाको अध्यक्ष पदमा निर्वाचित भएका छन् ।
कार्यक्रममा नयाँ कार्यसमिति गठन गर्दै २१ सदस्यीय नेतृत्व चयन गरिएको हो । सर्वसम्मत रूपमा अध्यक्षमा चयन भएका गिरीसहित सम्पूर्ण कार्यसमितिलाई प्रतिष्ठानका केन्द्रीय मानार्थ सदस्य हरि बिष्टले बधाई तथा सफल कार्यकालको शुभकामना दिएका छन् ।
मानार्थ सदस्य बिष्टले शुभकामना मन्तव्य दिँदै भने, “लोक तथा दोहोरी गीत हाम्रो मौलिक पहिचान हो । सुर्खेत शाखाले यसलाई संरक्षण र प्रवर्द्धन गर्न महत्वपूर्ण भूमिका खेल्दै आएको छ । नयाँ नेतृत्वले यस अभियानलाई अझ सशक्त बनाउने विश्वास लिएको छु ।”
कार्यक्रममा सुर्खेत शाखाका पदाधिकारी, सल्लाहकार, स्थानीय कलाकार, पत्रकार तथा विभिन्न संघ–संस्थाका प्रतिनिधिहरूको सहभागिता थियो । कार्यक्रममा स्थानीय सांस्कृतिक प्रस्तुति, दोहोरी गीत र सम्मान कार्यक्रम पनि गरिएको थियो ।
नवनिर्वाचित अध्यक्ष कविराज गिरीले आफ्नो कार्यकालमा लोक तथा दोहोरी गीतको संरक्षण, स्थानीय कलाकारको क्षमता अभिवृद्धि, र सांगीतिक कार्यक्रमहरूको नियमित आयोजनामा प्राथमिकता दिने बताएका छन् ।
सुर्खेत शाखाको यस नयाँ कार्यसमितिमा उपाध्यक्ष, सचिव, कोषाध्यक्ष र अन्य सदस्यहरू गरी २१ जना रहेका छन् । प्रतिष्ठानले निकट भविष्यमा जिल्लास्तरीय सांगीतिक महोत्सव गर्ने तयारी समेत गरेको जनाएको छ ।
प्रतिक्रिया दिनुहोस्