बम विस्फोट र इँटाभट्टामा जिउँदै मानिस जलाएको आरोप लागेका पूर्वमन्त्री अफताव आलमको मृत्यु

बम विस्फोट र इँटाभट्टामा जिउँदै मानिस जलाएको आरोप लागेका पूर्वमन्त्री अफताव आलमको मृत्यु
कमल कुमार शाही
स्वाभिमान खबर, कार्तिक २०
काठमाडौं
रौतहट बम विस्फोट र इँटाभट्टामा जिउँदै मानिस जलाएको जघन्य आरोप खेपिरहेका नेपाली कांग्रेसका नेता तथा पूर्वमन्त्री अफताव आलमको निधन भएको छ।
६३ वर्षीय आलमको गएराति २:५९ बजे सिनामंगलस्थित काठमाडौँ मेडिकल कलेज (केएमसी) अस्पतालमा उपचारकै क्रममा निधन भएको अस्पतालका प्रशासन प्रमुख नारायणप्रसाद दाहालले पुष्टि गरेका छन्।
आलम मिर्गौला रोग र उच्च रक्तचापका बिरामी थिए। स्वास्थ्य अवस्था बिग्रिएपछि दसैंअघि नै अस्पतालमा भर्ना भएका उनी पछिल्ला दिनहरूमा भेन्टिलेटरमा राखेर उपचार गरिँदै आएको थियो।
जेठ १४ गते नख्खु कारागारबाट रिहा भएका आलमलाई त्यसपछि मस्तिष्काघात (स्ट्रोक) भएको थियो। प्रारम्भिक उपचार माइतीघरस्थित अन्नपूर्ण न्युरो अस्पतालमा गरेपछि उनलाई थप उपचारका लागि केएमसीमा सारिएको थियो।

२०६४ सालको ‘राजपुर इँटाभट्टा’ काण्डमा आलममाथि गम्भीर आरोप२०६४ सालको पहिलो संविधानसभा निर्वाचनको पूर्वसन्ध्यामा रौतहटको राजपुर गाविस–४, फरहदवामा बम विस्फोट हुँदा केहीको मृत्यु र दर्जनौं घाइते भएको घटना नेपाली राजनीतिक इतिहासकै एक भयावह अध्याय बनेको थियो।
आरोपअनुसार, उक्त बम विस्फोटपछि आलमले घटनालाई लुकाउने उद्देश्यले मृतक र घाइतेहरूलाई ट्र्याक्टरमा राखी नजिकैको इँटाभट्टा चिम्नीमा लगेर जिउँदै जलाउन निर्देशन दिएका थिए।
पछिल्ला अनुसन्धानमा पनि आलमको संलग्नता र निर्देशनमा नै विस्फोट र त्यसपछिका कार्यहरू सम्पन्न भएको प्रमाण भेटिएको प्रहरी स्रोतले जनाएको थियो।
आलम र उनीसहितका केही व्यक्तिमाथि हत्या, विस्फोटक पदार्थ ऐन उल्लङ्घन र मानव अधिकार हनन सम्बन्धी मुद्दा दायर भएको थियो। उनी लामो समयदेखि नख्खु कारागारमा थुनामा थिए।

मन्त्री पददेखि विवादसम्मको यात्रा

रौतहट निवासी अफताव आलम नेपाली कांग्रेसबाट लामो समय राजनीतिमा सक्रिय रहे।
२०५४ सालमा उनी तत्कालीन प्रधानमन्त्री सूर्यबहादुर थापा नेतृत्वको सरकारले श्रम राज्यमन्त्री नियुक्त भएका थिए।
त्यसपछि २०५५ मा वन राज्यमन्त्री, २०५६ मा स्थानीय विकास राज्यमन्त्री, र पछि भूमिसुधार मन्त्रीसम्म बनेका थिए।
२०६४ सालको संविधानसभा निर्वाचनमा उनी प्रत्यक्ष निर्वाचित सांसद बनेका थिए।
पछिल्लो पटक उनी माधवकुमार नेपाल नेतृत्वको सरकारले श्रम तथा यातायात मन्त्रीको जिम्मेवारी दिइएको थिए।
२०६७ सालमा आलम नेपाली कांग्रेसको केन्द्रीय सदस्यमा निर्वाचित भएका थिए।

अस्पतालमा अन्तिम सास

आलमको स्वास्थ्य अवस्था केही हप्ता यता निरन्तर नाजुक बन्दै गएको थियो।
केएमसी अस्पतालका चिकित्सकका अनुसार उनलाई गम्भीर मिर्गौला समस्या, रक्तचाप अनियन्त्रित अवस्था र मस्तिष्काघातका कारण स्वास्थ्यमा जटिलता उत्पन्न भएको थियो।
उनको गएराति २:५९ बजे मृत्यु भएको पुष्टि गरिएको छ।

कांग्रेस नेताहरूको प्रतिक्रिया

अफताव आलमको निधनपछि नेपाली कांग्रेसभित्र मिश्रित प्रतिक्रिया व्यक्त भएको छ।
केही नेताहरूले लामो समय पार्टी र सरकार सञ्चालनमा योगदान दिएको स्मरण गर्दै श्रद्धाञ्जली प्रकट गरेका छन् भने केहीले उनको विवादास्पद विगत र न्यायिक मुद्दा अधुरो अवस्थामा अन्त्य हुनु दुर्भाग्यपूर्ण भएको प्रतिक्रिया दिएका छन्।

अन्त्यसँगै विवादित अध्याय टुंगियो

अफताव आलमको मृत्युले एक युगीन राजनीतिक यात्रा मात्र होइन, एक विवादास्पद अध्यायको पनि अन्त्य गरेको छ।
उनको निधनसँगै रौतहटको बहुचर्चित इँटाभट्टा घटनाको कानुनी निष्कर्ष भने अझै अधुरो नै रह्यो।