विश्वका वहालवाला कान्छा प्रधानमन्त्री शाह, नेपालको ४३औँ प्रधानमन्त्री नियुक्त
कमल कुमार शाही
स्वाभिमान खबर, चैत १३
काठमाडौं — नेपाली राजनीतिमा नयाँ इतिहास रचिँदै युवा नेतृत्वको उदय भएको छ। विश्वका वहालवाला कान्छा प्रधानमन्त्रीमध्ये गनिने शाह नेपालका ४३औँ प्रधानमन्त्रीका रूपमा नियुक्त भएका छन्। राष्ट्रपतिबाट भएको औपचारिक नियुक्ति सँगै उनले आज पद तथा गोपनीयताको शपथ ग्रहण गर्दै मुलुकको कार्यकारी नेतृत्व सम्हालेका हुन्।
प्रधानमन्त्रीमा नियुक्तिपछि राष्ट्रका नाममा सम्बोधन गर्दै शाहले देशलाई स्थायित्व, सुशासन र समृद्धिको मार्गमा अघि बढाउने प्रतिबद्धता जनाएका छन्। उनले विशेषगरी युवालाई केन्द्रमा राखेर रोजगारी सिर्जना, शिक्षा सुधार, प्रविधिमैत्री शासन प्रणाली भष्ट्राचार को अन्त्य र आर्थिक पुनरुत्थानलाई आफ्नो प्राथमिकतामा राख्ने बताएका छन्।
उनको उदयसँगै नेपाली राजनीतिमा नयाँ ऊर्जा र आशाको सञ्चार भएको विश्लेषण गरिँदैछ। लामो समयदेखि परम्परागत नेतृत्वबाट अघि बढिरहेको राजनीतिमा युवा पुस्ताको प्रतिनिधित्व गर्दै आएको यो परिवर्तनलाई धेरैले सकारात्मक रूपमा लिएका छन्। विशेषगरी युवामाझ उनको लोकप्रियता उल्लेखनीय देखिएको छ।
तर, चुनौतीहरू भने कम छैनन्। आर्थिक मन्दी, बेरोजगारी, भ्रष्टाचार नियन्त्रण, तथा राजनीतिक स्थायित्व कायम गर्ने जस्ता विषयहरू नयाँ प्रधानमन्त्रीका लागि प्रमुख परीक्षा बन्नेछन्। यी समस्याहरूको प्रभावकारी समाधानमार्फत उनले आफ्नो नेतृत्व क्षमता प्रमाणित गर्नुपर्नेछ।
यसैबीच, सत्तारूढ पक्षले शाहको नेतृत्वमा देशले नयाँ गति लिने विश्वास व्यक्त गरेको छ भने विपक्षी दलहरूले पनि उनको कार्यशैलीलाई नजिकबाट मूल्याङ्कन गर्ने बताएका छन्।
शाहको प्रधानमन्त्री नियुक्तिसँगै नेपालले फेरि एकपटक युवा नेतृत्वमाथि भरोसा गरेको सन्देश दिएको छ। अब उनको कार्यकालले मात्र होइन, परिणामले नै यो विश्वास कति सफल हुन्छ भन्ने निर्धारण गर्नेछ।
प्रतिक्रिया दिनुहोस्