ग्वार्को ‘फ्लाइओभर’काे प्रधानमन्त्री केपी शर्मा वलिकाे उपस्थितिमा उद्घाटन, देशको पहिलो फ्लाइओभर

ग्वार्को ‘फ्लाइओभर’काे प्रधानमन्त्री केपी शर्मा  वलिकाे उपस्थितिमा  उद्घाटन, देशको पहिलो फ्लाइओभर
देपेन्द्र बहादुर शाही
✍️ स्वाभिमान खबर | ६ असार २०८२, काठमाडौं

काठमाडौं उपत्यकामा सवारी जामको प्रमुख कारणमध्ये एक मानिने ग्वार्को चोकमा निर्माण गरिएको फ्लाइओभर (ओभरपास) आजदेखि औपचारिक रूपमा सञ्चालनमा आएको छ। नेपालको पहिलो फ्लाइओभरको रूपमा निर्माण भएको ग्वार्को ओभरपासको उद्घाटन प्रधानमन्त्री केपी शर्मा ओलीको प्रमुख उपस्थितिमा गरिएको हो।

उद्घाटन कार्यक्रममा प्रधानमन्त्री ओलीले उपत्यकाको ट्राफिक जाम व्यवस्थापनमा ट्राफिक प्रहरीको मेहनतलाई स्मरण गर्दै, ‘ओभरपासको उद्घाटनमा साक्षी बस्ने अवसर मिल्यो,’ भन्दै ट्राफिक प्रहरीका वरिष्ठ उपरीक्षक (एसएसपी) नवराज अधिकारीलाई नै रिबन काट्न आग्रह गरे।

उक्त अवसरमा प्रधानमन्त्री ओलीले ट्राफिक प्रहरी प्रमुखलाई खोज्दै अगाडि आउन आग्रह गरेपछि भौतिक पूर्वाधार तथा यातायात मन्त्रालयका सचिव केशवकुमार शर्माको पछाडि रहेका एसएसपी अधिकारी अगाडि आएका थिए। त्यसपछि प्रधानमन्त्री ओलीले आफ्नै हातमा रहेको कैँची एसएसपी अधिकारीलाई दिँदै रिबन काट्न आग्रह गरे, जुन नियमअनुसार प्रहरी प्रमुखले अभिवादन गर्दै गरे।

ओभरपासको एक छेउमा निर्माण गरिएको शिलालेखमा प्रधानमन्त्री ओलीबाट उद्घाटन गरिएको उल्लेख भए पनि रिबन भने ट्राफिक प्रहरी प्रमुख एसएसपी अधिकारीले काटे, जसलाई उपस्थित सबैले ताली बजाएर स्वागत गरे।

४ वर्षपछि निर्माण सम्पन्न

२०७८ सालमा निर्माण सुरु गरिएको फ्लाइओभर ४ वर्षको अवधिमा सम्पन्न भएको हो। इञ्जिनीयरिङ प्रोक्युरमेन्ट कन्स्ट्रक्सन (EPC) मोडेलमा निर्माण गरिएको यो ओभरपास आशिष-समानान्तर-रेलिगेर जेभी नामक निर्माण कम्पनीले रु १७ करोड ६ लाख ८८ हजार लागतमा तयार पारेको हो।

प्रमुख तथ्यहरू:

📍 स्थान: ग्वार्को चोक, काठमाडौं चक्रपथ (कलङ्की–कोटेश्वर खण्ड)

📏 लम्बाइ: ५०० मिटर (३५० मि. स्पान र १५० मि. अप्रोच सडक)

🛣 लेन: चार लेनको पुल

🧱 निर्माण मोडेल: EPC

🏗 निर्माण अवधि: २०७८–२०८२

प्रधानमन्त्रीको भनाइ

प्रधानमन्त्री ओलीले उद्घाटन कार्यक्रममा बोल्दै भने, “अब ग्वार्कोको सवारी जामको समस्या समाधान भएको छ। सरकारले बहुआयामिक र चौतर्फी विकासलाई प्राथमिकता दिएको छ। ग्वार्को फ्लाइओभर त्यही योजनाको प्रतीक हो।”

कार्यक्रममा भौतिक पूर्वाधार तथा यातायात मन्त्रालयका सचिव, विभागीय अधिकारीहरू, प्रहरी प्रशासन, निर्माण कम्पनीका प्रतिनिधि तथा स्थानीय नागरिकको उल्लेख्य सहभागिता थियो।
देशको पहिलो फ्लाइओभरका रूपमा चिनिएको ग्वार्को ओभरपासले काठमाडौंको चक्रपथमा सवारी जाम कम गर्ने अपेक्षा गरिएको छ। प्रधानमन्त्री ओलीको उपस्थितिमा ट्राफिक प्रहरीको हातबाट उद्घाटन गरिनु प्रशासनिक समन्वय र संस्थागत सम्मानको राम्रो उदाहरणका रूपमा हेरिएको छ।